“قلبي واجعني أوي”.. رسالة مؤثرة من ابنة محمد مرزبان بعد أسبوع من وفاته – خليجي نيوز

وجهت شهد مزربان، ابنة الفنان محمد مرزبان رسالة مؤثرة لوالدها بعد مرور أسبوع من وفاته، معبرةً عن اشتياقها الكبير له وعدم قدرتها على استيعاب رحيله.

رسالة ابنة محمد مرزبان بعد أسبوع على وفاته

وكتبت ابنة محمد مرزبان عبر حسابها على “فيسبوك”: “بابا عدى أسبوع من ساعة ما مشيت، ولسه مش قادرة أصدق إن دي الحقيقة، لسه مستنياك تدخل من الباب أو أسمع صوتك بتناديني، مش قادرة أستوعب إني مش هشوفك تاني ولا هسمع صوتك إلا في الصور والـ voice notes اللي بقيت بسمعها كل يوم وأسمع نصايحك ليا و”صباح الفل يا شهودة” عشان أصبّر نفسي”.

وتابعت: “كل يوم بصحى من النوم بتمنى إنه يكون كابوس وإن مفيش حاجة حصلت وأشوفك تاني، كان نفسي تقوم بالسلامة وتشوف حب الناس اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة وحلوه إحنا عشنا ولسه وهنفضل عايشين متشرفين إنك أبونا”.

وأضافت: “كان نفسي في حاجات كتير أوي لسه نعملها مع بعض، خروجات، وسفريات، وقعدة البيت نأكل على سفرة واحدة، وحسن وحمزة يصدعوك من كتر الكلام، وفرح جيسي وأحمد، وفطار يوم الجمعة بعد الصلاة، وقعدتنا نتفرج على فيلم ونتجمع نتفرج على ماتش وحاجات كتير أوي”.

واستكملت بتأثر شديد: “مشيت وسيبت فراغ كبير أوي قلبي واجعني يا بابا، بس أنا حلمت بيك واطمنت إنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي، كان نفسي أقولك كل يوم إني بحبك، كان نفسي أحضنك وأبوسك كل يوم، كان نفسي أقولك كل يوم إنك أعظم أب في الدنيا”.

واختتمت: “أنا هفضل كل يوم أدعيلك وأحاول أكون نسخة تانية منك وأعمل الحاجات الحلوة والخير اللي كنت بتعمله، وأربي عيالي إنهم يبقوا شبهك وزيك، بحبك أوي يا حبيبي يا روح قلبي، وإن شاء الله نتقابل في الجنة، الله يرحمك يا حبيبي”.

سبب وفاة محمد مرزبان

وكان محمد مرزبان تعرّض لحادث دراجة نارية أسفر عن إصابات بالغة، نُقل على إثرها إلى المستشفى لتلقي العلاج، قبل أن يُعلن عن وفاته متأثرًا بإصاباته، لتسدل الستار على رحلة فنية ترك خلالها بصمة لدى جمهوره ومحبيه.

اقرأ أيضًا:

“فقدنا أخا وفنانا راقيا”.. رسائل مؤثرة من الفنانين لـ محمد مرزبان

أبرزهم لقاء سويدان.. نجوم الفن في عزاء الفنان محمد مرزبان